Sobre nós
Web oficial do Sindicato Nacional do Ensino Privado de Galicia.
Naceu SNEPdG, o Sindicato Nacional do Ensino Privado de Galicia. Somos poucos, conscientes das grandes dificultades que teremos para facer escoitar a nosa voz no difícil mundo sindical. Non temos permanentes sindicais nin outros recursos económicos que as cotas da nosa afiliación. Pero temos ilusión, gañas, coñecementos e experiencia, e estamos dispostos a poñelos ao servizo das traballadoras e traballadores do ensino privado de Galicia no tempo libre que nos deixe o cumprimento da nosa xornada laboral. Só manda en nós a vocación de servizo. Non seguimos nin seguiremos os ditados de ningún partido político ou calquera outra organización. A nosa política é e será a estrita defensa dos intereses dos traballadores. Só política sindical.
Non opinaremos sobre o proceso catalán nin sobre calquera outro tema que non afecte directamente aos intereses do cadro de persoal. Só política sindical. Incrementar o salario, reducir a xornada, aumentar permisos, mellorar as nosas condicións laborais: esa será a nosa política. E, sobre todo, informar aos traballadores/as dos seus dereitos para que poidan defenderse dos abusos dos empresarios e dos políticos. Traballaremos de forma democrática, non aparentemente democrática, senón autenticamente democrática, é dicir, participativa. Porque se nas asembleas, nos comités, en calquera órgano do sindicato a afiliación non poden opinar, expresarse con total liberdade; se non son escoitados, se non se incorporan á política do sindicato e á súa acción diaria as súas opinións e ideas, seremos unha organización burocratizada e estalinista, como outras. E nacemos para ser diferentes, para levar á practica unha nova forma de facer sindicalismo nunha sociedade na que a cidadanía non se conforma con ser espectadora e reclama, con todo o dereito, o seu protagonismo.
As nosas forzas e recursos só nos permiten ocuparnos da ámbito do ensino privado en Galicia pero farémolo sempre desde unha perspectiva de solidariedade e internacionalista. As loitas laborais dos demais traballadores, de Galicia e de fóra de Galicia, de calquera outro lugar desta aldea globalizada que é o mundo actual, sempre terán o noso apoio; non seremos unha illa no mundo laboral preocupados só polo noso, e non esqueceremos nunca quen somos, cales son as nosas forzas e onde estamos.
Medraremos. Pouco a pouco.
A dignidade está no salario, e a nosa forza na nosa unión.
A información para todas e todos